واعظ اور استاد

ذہن میں کچھ سوالات تھے ۔

پہلے واعظ کی خدمت میں حاضر ہؤا۔ رعب تھا اور طمطراق! دستار بھی تھی، قبا  بھی  اور عصا بھی !  حاضرین ہمہ تن گوش تھے۔ بیان میں روانی تھی۔ الفاظ موسلا دھار بارش کی صورت برس رہے تھے۔  کہیں آبشار، کہیں میدان میں چلتی ہوئی ندی کی طرح خوش خرام !کہیں اشعار! کہیں امثال! کہیں قصے! کہیں حورو غلمان کے تذکرے اور ایسے کہ دماغ نہ مانے مگر واہ واہ کے ڈونگرےبرسیں! تشریف لے جانے لگے تو خوش عقیدگی رخصت کرنے  دور تک  آئی!  آنجناب اپنی بیش قیمت سواری پر بیٹھنےلگے تو اپنے بابرکت ہاتھوں کو چوما پھر ہاتھ لہرا کر  یہ بوسہ سامعین  کو  پہنچایا۔ بار بار یہ عمل  دہرایا۔ فرنگی اسے” فلائینگ کِس” کہتے ہیں ۔ عموما” یہ حرکت  نوخیز نوجوان  کرتے ہیں  مگر واعظ جب کریں تو اس پر تقدیس کا رنگ چڑھتا ہے ۔ عقیدتمند تتبّع کرتے ہیں ۔ تاہم میرا مسئلہ حل نہ ہؤا۔ ذہن میں جو سوالات تھے ان کے پوچھنے کی نوبت ہی نہ آئی۔ ان کے  متوسّلین سے بات کی  تو انہوں نے اسے گستاخی پر محمول کیا۔ ان کا موقف تھا کہ وعظ سنتے رہیے۔ آہستہ آہستہ سوالات کے جواب مل جائیں گے۔ مگر براہ راست ان سے سوال پوچھنا؟ یہ سُوءِ ادب ہے۔ اس کی اجازت حضرت دیں گے نہ ان کے جاں نثار !

پھر استاد کے پاس گیا۔ وہاں دستار تھی نہ عبائے فضیلت! نہ ہاتھ میں عصا! جاہ و جلال تھا  نہ تزک و احتشام ! قالین پر تشریف فرما تھے۔ سامنے کچھ کتابیں تھیں ۔ ارد گرد شاگرد ، نصف دائرہ باندھے ،   بیٹھے تھے۔ یہ علم کے متلاشی تھے ! یہ سوال پوچھتے ۔ استاد جواب دیتے۔ طالب علم مطمئن نہ ہوتا۔ پھر پوچھتا یہاں تک کہ سوال کبھی بحث کی صورت بھی اختیار کر لیتا۔  مگر استاد ہر سوال کا جواب دیتے۔جب تک شاگرد مطمئن نہ ہوتا سوال جواب کا سلسلہ جاری رہتا۔ حاضرین مجلس میں سے کوئی بھی استاد کے جواب پر مزید گفتگو کر سکتاتھا۔ مجھے بھی موقع ملا۔ سوالات کیے۔ کچھ سے تشفی ہوئی۔ جن سے نہ ہوئی، ان پر مزید سوال پوچھے۔ استاد نکتے سے نکتہ نکالتے جاتے۔ مثالیں دیتے۔ گذشتہ سکالرز کا حوالہ دیتے۔  کبھی ان سے بھی  اختلاف کرتے۔ علم کا سمندر تھے۔ مگر اپنی بات کو حرف آخر نہیں گردانتے تھے۔ خدا کاشکر ادا کیا  کہ مکالمہ ہؤا۔ تشنگی بجھی۔

قومیں استاد سے بنتی ہیں۔ واعظ سے نہیں۔ واعظ لوری  دے کر سلاتا ہے۔استاد جھنجھوڑتا ہے۔ جگاتا ہے اور سونے نہیں دیتا۔واعظ مسحور کرتا ہے، استاد سِحر کو اور سِحر کے اثرات کو زائل کرتا ہے۔ واعظ جوش دلاتا ہے، استاد ہوش میں لاتا ہے۔ واعظ  خوابوں کی دنیا میں لے جا کر، وہاں چھوڑ کر، اگلے مجمع کی طرف لپکتا ہے۔ استاد خواب سے حقیقت کی دنیا میں لاتا ہے۔ مسائل سمجھاتا ہے اور جینے کا ہنر سکھاتا ہے۔ واعظ ہمیشہ درباروں میں پایا جاتا ہے، استاد اپنے حلقۂ درس کو چھوڑ کر کہیں نہیں جاتا۔ واعظ بادشاہوں کی خدمت میں حاضر ہوتا ہے۔ بادشاہ استاد کی بارگاہ میں حاضری دیتا ہے۔ واعظ بادشاہ کے پاس آتا ہے تو خاموش ہو کر بادشاہ کی باتیں سنتا ہے۔بادشاہ اپنی تعریفوں کے پل باندھتا ہے۔استاد کا سامنا بادشاہ سے ہو جائے تو یہ  بادشاہ  ہے جو خاموش رہ کر استاد سے فیضیاب ہوتا ہے۔ بادشاہ استاد کے سامنے یاوہ گوئی کی جسارت ہی نہیں کرتا کجا کہ اپنی تعریفوں کے انبار لگائے۔واعظ حکمران کے سامنے نہی عن المنکر کی ہمت ہی نہیں کرتا۔ یہ استاد ہے جو بادشاہ کو روکتا ہے اور ٹوکتا ہے۔آج تک کسی  شاعر نے استاد کی شان میں گستاخی نہیں کی۔ اس لیے کہ مادر فطرت نے استاد کو پیدا ہی اس لیے کیا ہے کہ اس کا احترام کیا جائے ۔استاد اپنا احترام دلوں میں خود  پیدا کرتا ہے۔ واعظ کی تعریف صرف اس وقت تک ہوتی ہے جب تک اس کے لچھے دار الفاظ ہوا میں مرغولے بناتے رہتے ہیں۔  جیسے ہی یہ مرغولے  تحلیل ہو کر ناپید ہوتے ہیں، واعظ کے الفاظ اپنا اثر کھو دیتے ہیں۔یہ واعظ ہے جس کے بارے میں کبھی شاعر کو کہنا پڑتا ہے ؎

واعظان کین جلوہ بر محراب و منبر می کنند

چون بہ خلوت می روند آن کار دیگر می کنند

کہ محراب و منبر پر جلوہ افروز ہونے والے واعظ خلوت میں کیا کرتے ہیں، کچھ نہ پوچھو! 

اور کبھی شاعر کہتا ہے 

بڑی باریک ہیں واعظ کی چالیں 

لرز  جاتا  ہے آوازِ  اذاں سے 

سقراط سے گیلی لیو تک یہ استاد تھے جو اپنے شاگردوں سے مکالمہ کرتے تھے۔ ان کے آثار جو موجود ہیں، ان کے نام ہی “ ڈایالاگ “ ہیں۔ سقراط کے شاگرد افلاطون نے” مکالمات “ ترتیب دیے۔ پھر یہ اس کا شاگرد ارسطو تھا جس نے دنیا بھر کو بالعموم اور یورپ کو بالخصوص  تحقیق  کے اسالیب سکھائے اور جستجو کی تعلیم دی۔پھر مسلمان اس سے   فیضیاب ہوئے۔ 

یہ جن ائمہ کی آج مسلمانان عالم اتباع کر رہے ہیں ، امام جعفر صادق ہیں یا امام ابو حنیفہ یا امام مالک یا امام شافعی یا امام احمد بن حنبل۔ ان میں سے کوئی بھی واعظ نہیں تھا۔ یہ سب استاد کے مقام پر فائز تھے۔ ان کی مقدس مجالس میں سوال جواب ہوتے، بحث ہوتی، مکالمہ ہوتا تب جا کر کسی رائے کو قبولیت کا درجہ حاصل ہوتا۔  کون نہیں جانتا کہ امام ابو حنیفہ کے دونوں بڑے شاگردوں، امام محمد اور قاضی ابو یوسف نے اکثر معاملات و مسائل میں اپنے استاد سے اختلاف کیا اور یہ اختلاف اصول اور فروع دونوں میں تھا۔ یہاں تک کہ لوگوں نے سوال اٹھایا کہ ان  دونوں  شاگردوں کی  آرا اور فیصلوں کو  حنفی مسلک میں کیوں شمار کیا جاتا ہے  جب کہ ان کی  آرا امام ابو حنیفہ کی آرا سے بالکل مختلف ہیں؟ اس کی وجہ یہ تھی کہ امام ابو حنیفہ ہی نے ان دونوں شاگردوں اور دوسرے تمام شاگردوں کو اختلاف کا طریقہ سکھایا تھا۔  امام ابو حنیفہ پہلے ایک رائے قائم کرتے۔ پھر خود ہی اس کا رد کرتے ۔پھر ایک اور احتمال پیدا کرتے۔ اس  کے حق میں دلائل  دیتے۔ پھر خود ہی اس کے خلاف دلائل دیتے اور ایک نیا احتمال پیدا کرتے۔ اس طرح انہوں نے اپنے شاگردوں کو لکیر کا فقیر ہونے سے بچایا۔ تنقید اور جرح سکھائی۔ بحث کرنے کے انداز  بتائے۔ منطق اور عقل کو بروئے کار لانے اور تقلید سے بچنے کا ہنر سکھایا۔ مرحلہ وار مشق کرائی۔پھر یہ شاگرد  استاد سے کبھی اتفاق کرتے تو  کبھی اختلاف! واعظ وہیں کھڑا ہے جہاں یہ ائمہ چھوڑ کر گئے تھے۔ یہ استاد ہے جو آج کے مسائل کی روشنی میں نئے راستے دکھاتا ہے۔ کچھ سوچنے سمجھنے والے علما نے جب اسلامی بنکاری کا راستہ کھولا  تو واعظین نے مخالفت کی۔ جب متبادل کا پوچھا گیا تو ان کے پاس کوئی جواب نہ تھا۔ 

واعظ کی مجلس میں اس کے سوا کوئی اور نہیں بولتا نہ بول سکتاہے۔  واعظ سوال کا جواب دینے کی صلاحیت ہی نہیں  رکھتا۔  اس سے اگر جمہوریت کا پوچھا جائے تو کہے گا کہ جمہوریت درست نہیں ۔ پھر اس سے  دلائل مانگے جائیں اور یہ پوچھا جائے کہ جمہوریت کا متبادل کیا ہو گا تو وہ آئیں بائیں شائیں کرے گا۔ یہ تو استاد کی شان ہے کہ اگر جمہوریت کو رد کرے گا تو دلائل کے انبار لگادے گا۔ اس کا متبادل بتائے گا۔ یا جمہوریت کی حمایت کرے گا تو اس کے حق میں دلائل دے گا۔ اختلاف سنے گا اور اختلاف برداشت کرے گا !

اب خود حساب لگا لیجیے۔ آئینہ دیکھ کر فیصلہ کر لیجیے۔جو قومیں آگے بڑھی ہیں ، ان میں استاد زیادہ ہیں یا واعظ ؟

……………………………………………………………………