Home | Columns | Poetry | Opinions | Biography | Photo Gallery | Contact

Tuesday, July 06, 2010

دوست نوازی اور قطب جنوبی

میں ٹاک شوز سے بیزار ہوگیا تھا!

رات دن کے کسی حصے میں کوئی چینل بھی لگاتا تو ایک ہی منظر ہوتا۔ تین ’’عقل مند‘‘ ایک طرف بیٹھے ہوتے اور ایک ’’حد سے زیادہ عقل مند‘‘ دوسری طرف بیٹھا اُن تینوں کو آپس میں لڑا رہا ہوتا۔ ایک دن جہاز میں بیٹھا اور اس دور افتادہ جزیرے میں منتقل ہوگیا ، یہاں سے آگے کچھ نہیں۔ جنوب میں قطب جنوبی ہے۔ مشرق میں بحرالکاہل اور بحرالکاہل میں ایک اور جزیرہ نیوزی لینڈ۔

جس دن بیوی ڈش لگوا رہی تھی، میرا ماتھا ٹھنکا، ڈش سے تو یہ پاکستانی چینل دیکھے گی تو کیا یہاں بھی ٹاک شو …؟ وہ تو خدا کا شکرہے کہ وہ ڈرامے دیکھتی ہے‘ حالانکہ ہر ڈرامے میں ایک ہی کہانی ہے معاشقہ، شادی اور طلاق‘ جس طرح ہمارے مزاحیہ ’’شاعر‘‘ پڑوسن سے آگے جانے کو تیار نہیں، اسی طرح ہمارے ڈرامہ نگار عورت اور شادی کے سوا کسی موضوع پر نہیں لکھ سکتے۔
 جملہ معترضہ طویل ہوگیا۔ بہرطور ٹاک شوز سے نجات ملی۔ خوبصورت جزیرے میں چین سے گزر رہی تھی لیکن …؎

ٹوٹے گی کوئی تازہ بلا جانِ نہاں پر

لَو شمعِ حوادث کی ہے تھرائی ہوئی سی

لو تھرائی اور تازہ بلا ٹوٹ کرگری۔ میں جزیرے میں چھپتا پھر رہا ہوں۔ کبھی اس شہر میں، کبھی اُس قصبے میں، کبھی کسی دور افتادہ ساحل پر کبھی کسی پہاڑ کے دامن میں واقع گمنام قریے میں اور سرکاری ہرکارے میرے تعاقب میں ہیں۔

اس علاقے میں تین بڑے ملک ہیں۔ آسٹریلیا، نیوزی لینڈ اور انڈونیشیا۔کیا آپ یقین کرینگے کہ تینوں کے وزرائے اعظم نے مجھے طلب کیا ہوا ہے۔ کہاں میں کم مایہ بے بضاعت، ایک قالین اور ایک پیالے پر حجرے میں گزر بسر کرتا ہوا، اور کہاں یہ تین عظیم الشان کشور اور اُن کے حکمران لیکن بخت سیاہ ہو اور پیشانی تنگ ہو اور ستارہ بجھا ہوا ہو تو کچھ بھی کام نہیں آتا …؎

میں تمہارے عہد کی برکتوں کا نشان تھا

مرے سر پہ بُوم تھا زاغ تھا میرے ہاتھ میں

بالآخر ایک گمنام گاؤں میں، جہاں میں نے ایک آسٹریلوی شاعر کی دیہی قیام گاہ میں پناہ لی ہوئی تھی مجھے گھیرے میں لے لیا گیا اور ایک سرکاری عمارت میں لے جا کر پیش خدمت کر دیا گیا۔ مجھ پر خوف طاری تھا لیکن پھر بھی سچی بات یہ ہے کہ میں متاثر نہیں ہوا۔ تین ملکوں کے حکمران اندر جلوہ افروز… اور باہر نہ پولیس، نہ فوج، نہ ریڈ زون، نہ ناکے، نہ کاروں کے جلوس۔ بہرحال یہ ایک الگ موضوع ہے، قصہ کوتاہ یہ کہ میں پیش ہوا … تینوں وزرائے اعظم سے باری باری گفتگو کچھ اس طرح ہوئی۔

’’ہم تمہیں اس لئے نہیں ڈھونڈ رہے تھے کہ تم سے کوئی غلطی ہوئی ہے۔ ہم تمہارے ذریعے ایک اپنا کام کرانا چاہتے ہیں۔‘‘

حضور! حکم فرمائیں … میں حاضر ہوں… نظم لکھوانی ہے یا مضمون… کیونکہ میں یہی کچھ کر سکتا ہوں …

مجھے تو اور کوئی کام بھی نہیں آتا۔‘‘

’’نہیں، لکھنے لکھانے والے ہمارے ملکوں میں بہت زیادہ ہیں سو فیصد خواندگی والے ملکوں میں تمہارے لکھنے کی چنداں اہمیت نہیں… ہمیں کام یہ ہے کہ تمہارے ہاں سے ایک دو جوہر قابل درکار ہیں۔‘‘

’’میں اس ضمن میں وعدہ تو نہیں کرتا لیکن آپ حکم کریں۔‘‘

’’پہلے تو ہمیں وہ شیر مرد چاہیے جو تمہارے ایک صوبے کا وزیر اعلیٰ ہے، جس نے کہا ہے کہ ڈگری ڈگری ہوتی ہے چاہے وہ اصلی ہو یا جعلی اور یہ کہ جعلی ڈگریوں کا مجھ پر کوئی فرق نہیں پڑیگا۔ میں اب بھی اپنے گھر میں رہتا ہوں اور حکومت کے بعد بھی اپنے گھر میں رہوں گا۔ وزراء کی ڈگریاں جعلی ثابت ہونے پر بھی میری حکومت کو کوئی اثر نہیں پڑے گا۔‘‘

ایک لمحے کو مجھے گمان گزرا کہ یہ لوگ مذاق کررہے ہیں لیکن میرا اور ان کا کوئی مذاق تو تھا ہی نہیں، اور پھر لوگ بالکل سنجیدہ تھے۔ میں نے ادب سے پوچھا کہ … وہ شیرمرد آپ حضرات کوکیوں درکار ہے؟ ان میں سے ایک یوں گویا ہوا۔

’’ہم اُسے یہاں بلا کر تعلیم کا قلم دان سونپنا چاہتے ہیں۔ پورے کرۂ ارض پر اس شخص سے زیادہ اس منصب کا کوئی حق دار نہیں۔ ناخواندگی اورجعلی ڈگریاں ہم لوگوں کیلئے ایک رومانی داستان کی طرح ہیں اور ہم اسے پرستان کا قصہ سمجھتے ہیں۔ ہمیں یہ وزیر اعلیٰ چاہیے تاکہ ہمارے ملکوں کو ناخواندگی اور جعل سازی کے داستانوی ماحول میں لے جائے۔ ہم سمجھتے ہیں کہ یہ کام وہ بخوبی سرانجام دے گا۔‘‘

انہوں نے سلسلہ کلام جاری رکھا،

’’ہمیں اس مرد حق کے علاوہ ایک اور صوبے کا وزیر اعلیٰ بھی چاہیے، ہمارے اس خطے میں انسانی قدریں رُوبہ زوال ہیں … کوئی دوستوں کا خیال رکھتا ہے نہ رشتہ داروں کا اور نہ اُن کا جو جنم جنم کے وفادار ہیں۔ جس وزیراعلیٰ کی ہم اب بات کر رہے ہیں۔ سُنا ہے وہ دوست نوازی میں ثانی نہیں رکھتا۔ اپنے ایک وفادار کو کھپانے کیلئے اس نے تاریخ میں پہلی بار ایک صوبے میں چیف سیکرٹری کی دو اسامیاں پیدا کردی ہیں یہ کام کرۂ ارض پر پہلے نہیں ہوا تھا۔ اس نے یہ تاریخی کارنامہ اس لئے سرانجام دیا ہے کہ ایک صاحب جو پہلے چیف سیکرٹری تھے اور پھر ہٹانے پڑے، اُنہیں وہی منصب دیکر انکی شان میں جو کمی واقع ہوگئی تھی پوری کردی جائے‘ اگر یہ کارنامہ قابل تقلید سمجھا جائے تو ہر صوبے میں دو دو چیف سیکرٹری ہوں گے اور ہو سکتا ہے چیف منسٹر بھی دو دو ہو جائیں ( اگرچہ ایک صوبے میں اس وقت تین چیف منسٹر بھی ہیں چھوٹا بھائی، بڑا بھائی اور چھوٹے بھائی کا صاحب زادہ) اور کیا عجب دو دو گورنر بھی عالم وجود میں آ جائیں پھر یہ رَو اگر مرکز کا رُخ کرے تو ہو سکتا ہے۔ وزیراعظم بھی دو ہو جائیں اور صدر مملکت بھی دو ہوں۔‘‘

ہمیں یہ وزیر اعلیٰ اس لئے پسند ہے کہ اپنے وفاداروں کو حکومت کے خرچ پر نوازنا بہتر سمجھتا ہے۔ صوبے کے پبلک سروس کمیشن میں وفاداروں کی فوج ظفر فوج مزے اڑا رہی ہے اور طریق کار کیا ہے؟ صرف اتنا کہ جو وفادار ریٹائر ہوتا ہے (بالخصوص پولیس نے) تو ایک کہنہ مشق، ازکار رفتہ بیوروکریٹ جو وزیر اعلیٰ سے بھی بڑی ہستی کا مشیر اعلیٰ ہے اس ریٹائرڈ وفادار کو پیش خدمت کرکے دو بول سفارش کے عرض کرتا ہے اور تخت شاہی سے فرمان جاری ہو جاتا ہے اس سے بڑھ کر دوست نوازی کیا ہوگی کہ جس وزیر کیخلاف شکایات تھیں، اُسے نکالا نہیں گیا صرف محکمہ بدلا گیا اور اس پر بھی پریشانیاں لاحق ہیں اور حیرانیاں آڑے آ رہی ہیں۔

’’ہمیں یہ دوستوں کا دوست اس لئے چاہیے کہ ہم بھی اپنے خطے میں دو چیف سیکرٹری اور ہر شعبے کے دو دو سربراہ اور ہر ملک کے دو دو حکمران بنانا چاہتے ہیں بلکہ اس کا تعاون حاصل ہوگیا تو کیا عجب ہم اقوام متحدہ کے سیکرٹری جنرل بھی دو کروا سکیں۔ وہ جو شیخ سعدیؒ نے کہا تھا کہ ایک گدڑی میں دس فقیر سو جاتے ہیں لیکن ایک اقلیم میں دو بادشاہ نہیں سما سکتے تو اگر تنخواہ زیادہ ہو اور مراعات بے حد و بے شمار ہوں اور گاڑیوں کا پورا بیڑہ ہو اور سروں پر وزیر اعلیٰ کا ہاتھ ہو اور دلوں میں وفاداری بشرطِ استواری کا جذبہ ہو اور فنڈ، سارے عوام کے ٹیکسوں سے ہوں اور اسمبلی کے ارکان موم کے ہوں اور وزیر مُرغانِ بادنما ہوں تو دو نہیں دو سے زیادہ چیف سیکرٹری بھی بنائے جا سکتے ہیں۔میں نے وعدہ کیا کہ حکم کی تعمیل کروں گا اور جھک کر سلام کرنے کے بعد باہر نکل آیا۔

بھلا میں کہاں اور اتنے بڑے بڑے کام کہاں۔ افسوس! یہ جزیرہ بھی مجھے راس نہ آیا۔ اب میں سامان باندھ رہا ہوں اور سامان بھی کتنا ہے؟ ایک پھٹا ہوا پراناقالین اور ایک پیالہ۔ اب قطب جنوبی ہی میری پناہ گاہ ہے اور اسی طرف جا رہا ہوں۔

6 comments:

شازل said...

آپ نے بہت بڑھیا لکھا ہےانداز تحریر نے شروع سے لیکر آخر تک باندھے رکھا

سعد said...

شرم مگر ان کو نہیں آتی

Anonymous said...

Dear Izhar Sahib,

I am glad you took notice of the golden nuggets uttered by the Chief Minister of Balochistan. I am so excited about the power of computer and the internet - while being thousands of miles away from Pakistan, I have the ability to learn new things from Pakistani politicians and add to my humble knowledge the new ideas and thoughts such as a degree is a degree, real or fake. It explains a lot why Pakistan is such a highly developed country in every discipline; the art of politics or science and technology especially the management of the natural resources. Talking about natural resources, one cannot overlook the water management and its usage to generate electric power that runs the advanced industrial machinery to produce hi tech products for export, the products that the world is lining up to buy adding to the power and prestige of Pakistan in the global market.

With the grace of God, Pakistan, the land of the pure is undoubtedly a privileged country where whole families are dedicated to serve it. Starting from the example of the man from Larkana in Sindh, his daughter’s dedication, then moving on to his son-in-law’s selfless services with plans in place for the grand son to come back and take his rightful place among the chosen leaders to propel the country beyond the 7th heaven in dignity and affluence. One must not overlook of course, the family from the metropolis of Raiwind where the two brothers and the son of one of them are working so hard creating an unprecedented political and administrative synergy to move the country into the space where no country has gone before.

The country should be so proud, its land has a natural affinity to produce naturally born leaders from Larkana to Raiwind. But now, with God’s will, the chief minister of Balochistan has set new records for wisdom and astuteness by pointing out some thing about the fake degrees that no man had thought of before. With the intellectuals such as these, Pakistanis have no reason to be apprehensive about enemies such as India, CIA or MOSSAD. The land of the pure is no doubt on its way to be the envy of the world. Aren’t we all lucky to be living in interesting times.

Javed

تانیہ رحمان said...

کیا بات ہے اتنا خوبصورت طنز کاش ہمارے ملک کے حکمران پڑھ سکیں

افتخار اجمل بھوپال said...

بہت اچھا لکھا ہے ۔
آپ نے لکھا
ہر ڈرامے میں ایک ہی کہانی ہے معاشقہ، شادی اور طلاق
اسی لئے مجھے لڑکپن ہی سے فلميں ديکھنے کا شوق نہيں تھا
ايک وزيرِ اعلٰی تو ميری سمجھ ميں آ گئے کہ ميری سمجھ موٹی ہے ليکن يہ دو چيف سيکريٹريوں والے کون ہيں سمجھ نہيں آئی شايد ميں نے اُس دن اخبار نہ پڑھا سفر ميں ہوں گا يا کسی اپنے مسئلے ميں پھنسا ہوں گا

bdtmz said...

یہ دوسرا وزیر اعلی پنجاب کا تو نہیں؟ شہباز شریف کی یہ بہت گندی عادت ہے کہ وہ الٹ پلٹ بہت کرتا ہے۔ مجھے اس کے پرانے نظام کو تبدیل کر کے نئے نظام لانے پر شدید کوفت اور غصہ آیا تھا۔

Post a Comment

 

powered by worldwanders.com